पाल्पा । जिल्ला प्रहरी कार्यालय पाल्पाले रैनादेवी छहरा गाउँपालिकाको जंगल क्षेत्रबाट दुई थान अवैध भरुवा बन्दुक बरामद गरेको छ । विशेष गोप्य सूचनाको आधारमा खटिएको प्रहरी टोलीले बेवारिसे अवस्थामा रहेका ती हतियार नियन्त्रणमा लिएको हो । रैनादेवी छहरा गाउँपालिका–८ स्थित सुनाहा जंगलमा केही व्यक्तिहरू अवैध हतियार लिई सिकार खेल्न आएको भन्ने सूचना प्राप्त हुनासाथ प्रहरी सहायक निरीक्षकको कमान्डमा तत्काल टोली खटिएको थियो ।
प्रहरीले जंगल क्षेत्रमा पुगी व्यापक खोजतलास गर्ने क्रममा सिकारीहरू फेला नपरे पनि उनीहरूले छोडेका दुई थान भरुवा बन्दुक बेवारिसे अवस्थामा फेला पारेको हो । जिल्ला प्रहरी कार्यालय पाल्पाका सूचना अधिकारी एवं प्रहरी नायव उपरीक्षक (डिएसपी) होम प्रकाश चौधरीले बरामद हतियारबारे थप अनुसन्धान भइरहेको जानकारी दिएका छन् ।
पछिल्लो समय जिल्ला प्रहरी कार्यालय पाल्पाको प्रमुखका रूपमा प्रहरी उपरीक्षक (एसपी) दिपेन्द्र पंजियार थारुले कार्यभार सम्हालेसँगै जिल्लाको शान्ति सुरक्षाको अवस्थामा उल्लेख्य सुधार आएको महसुस गरिएको छ । एसपी थारुको आगमनपछि जिल्लामा शान्ति सुव्यवस्था कायम राख्न र आपराधिक गतिविधि नियन्त्रण गर्न प्रहरीले विशेष सक्रियता देखाएको छ । यो सक्रियताकै कारण गाउँघरमा लुकाई छिपाई राखिएका अवैध हतियारहरू बरामद हुन थालेका छन् ।
विशेषगरी निर्वाचनलाई लक्षित गर्दै एसपी थारुले जिल्लाभरको सुरक्षा व्यवस्थालाई थप कडा र चुस्त बनाएका छन् । उनी स्वयं जिल्लाका विभिन्न प्रहरी युनिटहरूमा पुगेर सुरक्षा अवस्थाबारे जानकारी लिने, मातहतका प्रहरी कर्मचारीलाई आवश्यक निर्देशन दिने तथा स्थानीय नागरिकहरूसँग प्रत्यक्ष भेटघाट र अन्तरक्रिया गरी सुझाव लिने कार्यमा जुटेका छन् । प्रहरी नेतृत्वको यस्तो सक्रियताले सर्वसाधारणमा सुरक्षाको प्रत्याभूति बढेको पाइएको छ ।
