भैरहवा । भारतीय पर्यटक आकर्षित गर्ने उद्देश्यले कपिलवस्तुको चन्द्रौंटामा ग्रीन ज्याकपट क्यासिनो सञ्चालनमा आएको छ । चन्द्रौंटास्थित चारतारे सिद्धार्थ लुम्बिनी ग्रीन रिर्सोटमा बुधबारबाट उक्त क्यासिनो सञ्चालनमा आएको हो । कपिलवस्तुमा पहिलोपटक क्यासिनो सञ्चालन भएपछि भारतीय पर्यटक बृद्धि हुने विश्वास गरिएको छ ।
चन्द्रौटामा सञ्चालनमा रहेको सिद्धार्थ लुम्बिनी ग्रीन रिर्सोटमा आकर्षक गेमिङ सुविधासहित क्यासिनो संचालनमा आएको हो । सञ्चालनमा आउने बित्तिकै कृष्णनगर लगायत नाका भएर क्यासिनो खेल्न आउने भारतीय पर्यटकको संख्या उल्लेख्य बृद्धि हुने सञ्चालकले जनाए ।
एक अर्ब रुपैयाँ लगानीमा सञ्चालनमा आएको उक्त रिर्सोटमा आधिकारिक रुपमा बुधबारबाट क्यासिनो सञ्चालनमा आएको हो । प्रत्यक्ष ५ सय र अप्रत्यक्ष एक हजार जनालाई रोजगारी उपलब्ध गराउने गरि १५ करोड रुपैयाँ लगानीमा क्यासिनो सञ्चालनमा ल्याइएको क्यासिनोका अध्यक्ष राजकुमार भट्टराईले जानकारी दिए ।
क्यासिनोका म्यानेजिङ डाइरेन्टर राजिव आचार्यले प्रतिदिन ५ सय भारतीय पर्यटकलाई सेवा दिनेगरि क्यासिनो सञ्चालनमा आएको जनाए । चन्द्रौंटा र कृष्णनगरलाई पर्यटकीय हवका रुपमा बिकास गर्न सिद्धार्थ लुम्बिनी ग्रीन रिर्सोटले क्यासिनो सञ्चालनमा ल्याएको आचार्यले बताए । क्यासिनो सञ्चालनले कृष्णनगरबाट मुलुक भित्रिने पर्यटकले गेमिङका लागि लुम्बिनी भैरहवा र नेपालगन्ज सहर जानुपर्ने बाध्यता अन्त्य भएको उनले बताए ।
