नवलपरासी । राष्ट्रिय स्वतन्त्र पार्टी (रास्वपा) का सभापति रवि लामिछानेले मुलुकको राजनीतिक इतिहास बदल्ने बेला आएको उद्घोष गर्नुभएको छ । नवलपरासीमा आयोजित कार्यक्रमलाई सम्बोधन गर्दै सभापति लामिछानेले आगामी निर्वाचन केवल कुनै व्यक्ति वा पार्टीको जितहारको विषय मात्र नभई जनता आफैँले आफ्नो भविष्यको नयाँ इतिहास लेख्ने एउटा महत्वपूर्ण अवसर भएको बताउनुभयो ।
उपस्थित जनसमुदायको व्यापक उत्साह र चर्को नाराबाजीका बीच सम्बोधन गर्दै लामिछानेले आफूहरू सस्तो लोकप्रियताका लागि ठुला भाषण गर्न नभई जनताका आधारभूत समस्याहरू नजिकबाट बुझ्न र तिनको ठोस समाधान खोज्न मैदानमा आएको स्पष्ट पार्नुभयो ।
आगामी २१ गते हुने निर्वाचनका लागि अग्रिम शुभकामना व्यक्त गर्दै उहाँले पुराना राजनीतिक दल र नेताहरूले विगतमा गरेका बाचा र कामको गम्भीर मूल्याङ्कन गर्ने जिम्मा अब जनताकै हातमा रहेको उल्लेख गर्नुभयो । यसअघि पटक–पटक निर्वाचन जितेर गएकाहरूको काम र व्यवहारलाई आगामी २१ गते मतदानमार्फत उचित जवाफ दिन आग्रह गर्दै उहाँले देशले भोगिरहेको दुःख र सास्तीको अन्त्य गर्ने दिन नजिकिएको दाबी गर्नुभयो ।
मुलुकलाई आर्थिक र राजनीतिक स्थिरता तर्फ लैजान अब स्पष्ट मार्गचित्रका साथ अगाडि बढ्नुपर्नेमा लामिछानेले जोड दिनुभयो । उहाँले देशको चौतर्फी विकासका लागि ‘एउटै बहुमतको सरकार, एउटै चुनाव चिन्ह र एउटै प्रधानमन्त्री’ को अवधारणा अघि सार्दै राजनीतिमा व्यक्तिगत इच्छा र आकाङ्क्षा भन्दा माथि उठेर साझा मुद्दामा सबै एकजुट हुनुपर्ने धारणा राख्नुभयो ।
नयाँ शक्तिहरू मिल्नुपर्ने जनचाहना अनुसार नै आफूहरू कुनै स्वार्थ बिना अगाडि बढेको दाबी गर्दै लामिछानेले अबको राजनीति घोषणापत्रको पानामा मात्र सीमित नभई व्यवहारमा देखिने गरी परिवर्तन ल्याउने प्रतिबद्धता व्यक्त गर्नुभयो । कार्यक्रममा स्थानीय उम्मेदवारहरूको पक्षमा जनमत सिर्जना गर्न आग्रह गर्दै उहाँले परिवर्तनका लागि जनताको सक्रिय साथ र समर्थन अनिवार्य रहेको बताउनुभयो ।
