बुटवल । लुम्बिनी प्रदेश सरकारमा लोकतान्त्रिक समाजवादी पार्टी (लोसपा) का सन्तोष कुमार पाण्डेय युवा तथा खेलकुदमन्त्री नियुक्त भएका छन् । उनले सोमबार प्रदेश प्रमुख कृष्णबहादुर घर्ती समक्ष पद तथा गोपनीयताको शपथ लिएका हुन् । यो सँगै लुम्बिनी प्रदेशको मन्त्रिपरिषद् १२ सदस्यीय पुगेको छ ।
मुख्यमन्त्री चेतनारायण आचार्यले आइतबार पाण्डेयलाई मन्त्री नियुक्त गर्दै मन्त्रिपरिषद् विस्तार गरेका थिए । यसअघि युवा तथा खेलकुद मन्त्रालय मुख्यमन्त्री आचार्य आफैँले सम्हाल्दै आएका थिए । पाण्डेय लोसपा संसदीय दलका नेता हुन् र यो उनको तेस्रो पटकको मन्त्री कार्यकाल हो । शपथ ग्रहण समारोहमा मुख्यमन्त्री आचार्य, पूर्वमुख्यमन्त्री डिल्लीबहादुर चौधरी तथा अन्य मन्त्रीहरुको उपस्थिति रहेको थियो ।
