भैरहवा । भैरहवामा जारी प्रधानमन्त्री कप क्रिकेट प्रतियोगितामा कर्णाली प्रदेशले लुम्बिनी प्रदेशलाई पराजित गरेको छ । कर्णालीको कसिलो बलिङ्गको अगाडी आफ्नै गृहमैदानमा लुम्बिनी पराजित हुन पुगेको हो । कर्णालीले लुम्बिनीलाई ६० रनले पराजित गरेको हो ।
लुम्बिनीले टस जितेर कर्णालीलाई ब्याटिङ्गको निम्तो दिएको थियो । भैरहवाको खराब मौषमका कारण ५० ओभरको खेललाई ४५ ओभरमा झारिएको थियो । कर्णाली निर्धारित ४५ ओभर पुरा खेल्दै ९ विकेटको क्षतिमा १ सय ८४ रन बनाएको थियो । कर्णालीको सुरुवात राम्रो हुन सकेन । उसका सुरुवाती ब्याटरहरु टिकेर खेल्न नसक्दा सुरुमा कर्णाली दबाबमा परेको थियो । २३ रनमै पहिलो विकेटको रुपमा राजेश खडकालाई उनको ७ रनको अवश्थामा गुमाएको कर्णालीले त्यसपछि २४ रनमै दोश्रो विकेटको रुपमा विपिन शाहीलाई गुमायो । शाही संगै दिवन पुन अनुज चुनारा विपिन शर्मा पनि डक आउट भए ।
कर्णालीका लागि आठौ विकेटको रुपमा आएका दिपेन्द्र रावत र दिनेश अधिकारीको जोडीले टिमलाई जितको बलियो आधार दिलाए । ६६ बलमा ५० रनको साझेदारी नै कर्णालीको लागि निर्णायक रह्यो । कर्णालीको लागि दिनेश अधिकारीले अर्धशतकिय पारी खेले । उनले ५९ बलमा २ छक्का र ६ चौकाको मद्दतमा अविजित ५६ रन बनाए । यस्तै दिपेन्द्र रावतले ४७ र हिमान्सु शाहीले २५ रनको ब्यक्तिगत योगदान दिए ।
बलिङ्ग तर्फ लुम्बिनीका निर्मल गुरुङ्ग र अभिषेक गौतमले समान ३÷३ विकेट लिए ।
१ सय ८५ रनको बिजयी लक्ष्य सहित मैदान छिरेको लुम्बिनीलाई कर्णालीले सुरु देखि नै दबाबमा राख्यो । सुरुवाती ब्याट्रहरु टिकेर खेल्न सकेनन् । ओपनिङ ब्याट्र मृनाल गुरुङ्ग (२२ रन) बाहेक अन्य ब्याटरहरु मैदान आउजाउ मात्र गरिरहे । सातौ विकेटको रुपमा आएका कृष्ण कार्कीले टिमको लागि केही आशा जगाए पनि अन्ततः उनले पनि टिमलाई जित दिलाउन सकेनन् । दिवन पुनको बलमा बोल्ड हुनु अघि कार्कीले टिमको लागि ७७ बल खेल्दै १ छक्का र ३ चौकाका मद्दतमा ४७ रन प्रहार गरेका थिए ।
लुम्बिनीको टोलीलाई कर्णालीका दिनेश अधिकारी, अनुज चुनारा र दिपेन्द्र रावतले खेल अवधिभर चल्न दिएनन् । ६ ओभर बलिङ गरेका दिनेश अधिकारीले १ मेडेन राख्दै १८ रन खर्चिएर ३ महत्वपूर्ण विकेट लिए । यस्तै अनुज चुनारा र दिपेन्द्र रावतले समान २÷२ विकेट लिए ।
लुम्बिनी र कर्णाली बिच भएको खेलमा ५६ रन बनाएर ३ विकेट समेत लिएका कर्णालीका दिनेश अधिकारी म्यान अफ द प्लेयर घोषित भए ।
बिहिबारको खेल सुदूर पश्चिम प्रदेश र गण्डकी प्रदेश बिच हुदै छ । भैरहवाको सिद्धार्थ क्रिकेट रङ्गशालामा सुदूर अहिले सम्म अविजित रहेको छ भने गण्डकीले आफ्नो २ खेल गुमाईसकेको छ ।
