मर्चवार । कोटहीमाई गाउँपालिकाको आयोजना र लुम्बिनी म्याक्स अस्पतालको प्राविधिक सहयोगमा बृहत् स्वास्थ्य शिविर सम्पन्न भएको छ । कटया आधारभूत विद्यालयमा आयोजित उक्त शिविरबाट करिब ३०० जना स्थानीयले निःशुल्क स्वास्थ्य सेवा लिएका छन् । शिविरमा हाडजोर्नी, महिला तथा प्रसूति, पाठेघरसम्बन्धी समस्या र जनरल फिजिसियनमार्फत विभिन्न रोगको परीक्षण तथा उपचार सेवा प्रदान गरिएको गाउँपालिकाका सामाजिक विकास शाखा प्रमुख अजय सिंह क्षेत्रीले जानकारी दिनुभयो ।
कार्यक्रममा बोल्दै गाउँपालिका उपाध्यक्ष सुशिला कुमारी यादवले मर्चवार क्षेत्रमा विशेषज्ञ अस्पतालको अभाव रहेकाले गाउँपालिकाले नागरिकको स्वास्थ्यलाई प्राथमिकतामा राखेर नियमित शिविर सञ्चालन गर्दै आएको बताउनुभयो । उहाँले महिला र विपन्न समुदायलाई लक्षित गरी आयोजना गरिएको शिविरमा सहभागी भई समयमै स्वास्थ्य उपचार गराउन र स्वस्थ जीवनशैली अपनाउन सबैलाई आग्रह गर्नुभयो ।
