काठमाडौँ । नेपाल कम्युनिष्ट पार्टी (एमाले) र नेपाली कम्युनिष्ट पार्टी (नेकपा) बिच प्रदेश सरकार गठन तथा सञ्चालनका लागि तीनबुँदे सहमति भएको छ । दुवै दलका प्रमुखबिच प्रदेश सभामा उत्पन्न बजेट सम्बन्धी असमझदारी र अस्वस्थ राजनीतिक प्रतिस्पर्धा अन्त्य गर्दै सुशासन, समृद्धि र राजनीतिक स्थिरता कायम गर्ने उद्देश्यले सो सहमति भएको हो ।
सहमति अनुसार दुवै दलले प्रदेश सभाहरूमा सहकार्य गर्दै संयुक्त सरकार गठन गर्नेछन् । जसअन्तर्गत कोशी, बागमती र लुम्बिनी प्रदेश सरकारको नेतृत्व एमालेले गर्नेछ भने कर्णाली र सुदूरपश्चिम प्रदेशको नेतृत्व नेकपाले सम्हाल्नेछ । यस्तै, मधेश र गण्डकी प्रदेशको हकमा भने प्रदेश सभामा प्रतिनिधित्व गर्ने अन्य राजनीतिक दलहरूसँग समेत परामर्श गरी सरकारको नेतृत्व र सहभागिताको स्वरूप तय गरिने भएको छ । उक्त सहमतिपत्रमा एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ ले हस्ताक्षर गर्नुभएको छ । दुवै दलले प्रदेशमा स्थिर सरकारमार्फत जनअपेक्षाअनुसार विकास र सुशासनलाई अघि बढाउने प्रतिबद्धता व्यक्त गरेका छन् ।
