भैरहवा । चितवन सिमलतालको पहिरोमा परि हराईरहेको बस खोज्न भारतीय विशेषज्ञ सहितको टोली भैरहवाको बेलहिया नाका हुदै नेपाल प्रवेश गरेको छ ।
भारतको राष्ट्रिय आपदा मोचन बल (एनडिआरएफ) का डिसी कुणाल तिवारीको नेतृत्वमा १२ जनाको टोली राती १२ बजे बेलहिया नाका हुदै नेपाल प्रवेश गरेको हो । टोलीलाई राती भैरहवामा राखी विहानै चितवन तर्फ पठाईएको रुपन्देहीका प्रमुख जिल्ला अधिकारी गणेश अर्यालले बताए । उनले गृह तथा परराष्ट्र मन्त्रालयको समन्वयमा टोली नेपाल आएको जानकारी दिए । भारतिय टोली उद्दार सामाग्री ४ वटा गाडीमा नेपाल छिरेको हो ।
चितवनको सिमलतालमा खसेको बस घटना भएको एक साता हुदा समेत भेटिएको छैन । उक्त बस पत्ता लगाउन सरकारले भारतीय विशेषज्ञहरुको सहयोग लिने बताएको थियो । सोही अनुसार भारतीय एनडिआरएफको टोली नेपाल आएको हो ।
शनिबार विहान नै शसस्त्र प्रहरीको सहयोगमा टोलीलाई चितवन पठाईएको प्रजिअ अर्यालले जानकारी दिए ।
