भैरहवा । रुपन्देहीको सिद्धार्थनगर नगरपालिकाका पूर्व उपप्रमुख राम रतन गुप्ताको निधन भएको छ। उहाँको निधनमा शोक व्यक्त गर्दै नगरपालिकाले बिहीबार (भोलि) एक दिन शाेक बिदा दिने निर्णय गरेको छ । नगरपालिकाका नगर प्रमुख इस्तियाक अहमद खाँले एक सूचना जारी गर्दै पूर्व उपप्रमुख गुप्ताको असामयिक निधन भएको जानकारी दिनुभएको हो। गुप्ताको निधनले सिंगो नगरपालिका परिवारलाई स्तब्ध बनाएको बताउँदै नगर प्रमुख खाँले उहाँले नगरपालिकाको विकास, सुशासन र जनसेवामा पुर्याउनुभएको योगदान सधैं स्मरणीय रहने बताउनुभएको छ।
नगरपालिकाले यस दुःखद घडीमा दिवंगत आत्माको बैकुण्ठवासको कामना गर्दै शोकसन्तप्त परिवारजनप्रति गहिरो समवेदना समेत प्रकट गरेको छ। शोकको यस घडीमा दिवंगत आत्माको सम्मानस्वरुप नगरपालिकाले भोलि शोक बिदा दिने निर्णय गरेको हो। उक्त निर्णय अनुसार नगरपालिका मातहतका सम्पूर्ण कार्यालयहरूका साथै नगर क्षेत्रभित्र रहेका सामुदायिक, संस्थागत तथा धार्मिक विद्यालयहरू पूर्ण रूपमा बन्द रहने नगरपालिकाले जनाएको छ।
