भैरहवा । रुपन्देही नागरिक समाजले भदौ २३ गते जेन जेड समूहले भ्रष्टाचार र बेथितीविरुद्ध आह्वान गरेको आन्दोलनमा ज्यान गुमाएका वीर शहीदहरूप्रति श्रद्धाञ्जली अर्पण गरेको छ । समाजले शुक्रबार एक विज्ञप्ति जारी गर्दै शोकसन्तप्त परिवारजनमा गहिरो समवेदना व्यक्त गरेको छ भने अस्पतालमा उपचाररत घाइतेहरूको शीघ्र स्वास्थ्य लाभको कामना गरेको छ ।
समाजले आन्दोलनको मौका छोपी विभिन्न आपराधिक समूहहरू घुसपैठ भई सार्वजनिक सम्पत्तिमाथि गरिएको तोडफोड तथा आगजनीको घोर भत्र्सना गरेको छ । नयाँ बन्ने सरकारले स्वतन्त्र न्यायिक आयोग गठन गरी दोषीउपर कडा कारबाही गर्नसमेत समाजले माग गरेको छ ।
विज्ञप्तिमा भनिएको छ, “यो आन्दोलनले ऐतिहासिक सफलता हासिल गरेको छ । यसलाई आन्दोलनको उद्देश्य, भावना र मर्मअनुसार सफल पार्न ऊर्जाशील युवाहरू (जेन जेड समूह) लाई गम्भीरताका साथ सोचविचार र संयमित भई सार्थक परिणाम निकाल्न हार्दिक अपील गर्दछ ।”
देशको सकारात्मक परिवर्तनका लागि आन्दोलनलाई यहाँसम्म ल्याइपुर्याउन जेन जेड समूहको अहम भूमिकाको समाजले प्रशंसा गरेको छ, जसमा सबै पक्षको साथ र सहयोग रहेको पनि उल्लेख छ । रुपन्देही नागरिक समाजले “यो देश सबै पक्षको हो भन्ने यथार्थलाई हृदयंगम गरी आन्दोलनलाई सार्थकता दिन विशेष गरी अन्य पक्षका युवा शक्तिलाई पनि साथमा लिई अगाडि बढ्न” हार्दिक अपिल गरेको छ । समाजले सकारात्मक परिवर्तनका लागि सदैव जेन जेड समूहको साथमा रहने प्रतिबद्धता व्यक्त गरेको छ । त्यस्तै, अविलम्ब सरकार गठन गरी देशलाई अग्रगामी दिशातर्फ लैजान सबै पक्ष संयमित हुन पनि समाजले अपील गरेको छ ।
