भैरहवा । सशस्त्र प्रहरी बल नेपालका महानिरीक्षक नारायणदत्त पौडेलले सीमा सुरक्षा तथा राजस्व चुहावट नियन्त्रणमा थप संवेदनशील भई परिचालन हुन कमाण्डरहरूलाई निर्देशन दिनुभएको छ । रुपन्देहीस्थित सशस्त्र प्रहरी बल नेपाल नं. २७ गण हेडक्वार्टरमा आयोजित कार्यक्रममा महानिरीक्षक पौडेलले रुपन्देही, कपिलवस्तु र पश्चिम नवलपरासीका गणपति, सीमा सुरक्षा गुल्मपति, बोर्डर आउट पोस्ट (बीओपी) पति तथा बेसपतिहरूलाई उक्त निर्देशन दिनुभएको हो ।
कार्यक्रमपश्चात् उहाँले सिद्धार्थनगर नगरपालिका–१ बेलहियास्थित नेपाल–भारत सीमा क्षेत्रको स्थलगत अनुगमन गर्नुभएको थियो । अनुगमनका क्रममा उहाँले सीमा सुरक्षामा नयाँ अभ्यासका रूपमा सञ्चालन गरिएको ‘बोर्डर इन्टरयाक्सन टिम’ (बीआइटी) लाई अझ प्रभावकारी रूपमा कार्यसम्पादन गर्न आवश्यक निर्देशन दिनुभयो ।
