भैरहवा । रुपन्देही जिल्लाका प्रमुख जिल्ला अधिकारी माधव प्रसाद पोखरेलले आगामी फागुन २१ गते हुने प्रतिनिधिसभा निर्वाचनका लागि जिल्लाभर सुरक्षा व्यवस्था कडा पारिएको बताउनुभएको छ। सिद्धार्थनगर–५ स्थित बाल मन्दिरमा निर्वाचन क्षेत्र नम्बर ३ को कार्यालय स्थापना कार्यक्रमलाई सम्बोधन गर्दै उहाँले निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न सबै सुरक्षा निकाय तयारी अवस्थामा रहेको जानकारी दिनुभयो।
उहाँले उम्मेदवार, कर्मचारी र संवेदनशील क्षेत्रहरूको सुरक्षालाई प्राथमिकतामा राखेर विशेष सुरक्षा योजना कार्यान्वयन गरिएको स्पष्ट पार्नुभयो। साथै, उहाँले निर्वाचनलाई शान्तिपूर्ण रूपमा सम्पन्न गर्न राजनीतिक दल, नागरिक समाज तथा सर्वसाधारणलाई आवश्यक सहयोग र समन्वयका लागि अपिल समेत गर्नुभएको छ ।
