सन्धिखर्क । "श्रम आप्रवासन चक्रमा सुशासन: सुरक्षित, मर्यादित र सीपयुक्त आप्रवासन" भन्ने मूल नाराका साथ सन्धिखर्कमा अन्तराष्ट्रिय आप्रवासन दिवस मनाइएको छ। दिवसको अवसरमा वैदेशिक रोजगारीको क्रममा ज्यान गुमाएका श्रमिकका सन्ततिहरूलाई शैक्षिक सामग्री हस्तान्तरण गरिएको छ।
सन्धिखर्क नगरपालिकाका उपप्रमुख मिश्रा आचार्य, निमित्त प्रमुख प्रशासकीय अधिकृत नवराज गौतम र सामी (SAMI) जिल्ला कार्यक्रम संयोजक बसन्त श्रेष्ठ लगायतले श्रमिकका सन्ततिलाई शैक्षिक सामग्री प्रदान गर्नुभएको हो । कार्यक्रममा बोल्दै उपप्रमुख आचार्यले वैदेशिक रोजगारीलाई सुरक्षित र मर्यादित बनाउन आप्रवासी स्रोत केन्द्रको भूमिका महत्वपूर्ण रहेको बताउनुभयो ।
सुरक्षित आप्रवासन (सामी) कार्यक्रम नेपाल सरकार र स्वीट्जरल्याण्ड सरकारको द्विपक्षीय पहलमा सञ्चालित छ, जसलाई हेल्भेटास नेपालले प्राविधिक सहयोग उपलब्ध गराइरहेको छ। कार्यक्रममा पत्रकार महासंघका अध्यक्ष गणेश खनाल, लुम्बिनी प्रदेश सदस्य राजेन्द्र पन्थी लगायतले मन्तव्य राख्दै आप्रवासी श्रमिकको योगदानको कदर र उनीहरूको अधिकारको सम्मानमा जोड दिनुभयो। जिल्ला प्रशासन कार्यालयमा स्थापित स्रोत केन्द्रले सुरक्षित र सीपयुक्त आप्रवासनका लागि परामर्श र सहयोग प्रदान गर्दै आएको छ।
