पाल्पा । जिल्ला प्रहरी कार्यालय पाल्पाले 'प्रहरी-विद्यालय सम्पर्क कार्यक्रम' अन्तर्गत तानसेन बहुमुखी क्याम्पसका विद्यार्थीहरूसँग अन्तरक्रिया तथा कार्यालय अवलोकन कार्यक्रम सम्पन्न गरेको छ । विद्यार्थीहरूको उल्लेख्य सहभागिता रहेको उक्त कार्यक्रममा कार्यालय प्रमुख एवं प्रहरी उपरीक्षक (एसपी) दिपेन्द्र पंजियार थारु र प्रहरी नायव उपरीक्षक (डिएसपी) होम प्रकाश चौधरीले सहजीकरण गर्दै प्रहरीको दैनिक कार्यसम्पादन, अनुसन्धान प्रक्रिया र सेवा प्रवाहका विविध पक्षमा प्रकाश पार्नुभएको थियो ।
कार्यक्रममा विशेष गरी समाजमा बढ्दो चुनौतीका रूपमा रहेको साइबर अपराध, यससम्बन्धी कानुनी व्यवस्था र जिल्लामा घटेका घटनाहरूबारे जानकारी गराउँदै विद्यार्थीहरूलाई सचेत रहन आग्रह गरिएको थियो । एसपी दिपेन्द्र पंजियार थारुले जिल्लाको कमान्ड सम्हालेयता पाल्पाको शान्ति सुरक्षा र समग्र प्रहरी सेवा प्रवाहमा देखिएको सकारात्मक परिवर्तनको स्थानीय स्तरमा चौतर्फी प्रशंसा भइरहेको छ।
उहाँको नेतृत्वमा नागरिक मैत्री सेवा प्रवाहलाई प्राथमिकतामा राखिएपछि स्थानीय बासिन्दाले सुरक्षाको बलियो प्रत्याभूति र सेवामा सहजता महसुस गरेका छन्। विद्यार्थीहरूसँगको यस किसिमको प्रत्यक्ष अन्तरक्रियाले प्रहरी र नागरिकबीचको दुरी कम गर्न मद्दत पुग्नुका साथै युवा पुस्तामा प्रहरी संगठनप्रति सकारात्मक धारणा विकास गर्न एसपी पंजियारको अग्रसरता महत्त्वपूर्ण सावित हुने विश्वास गरिएको छ।
