जी.आई. भोजपुरियाद्वारा "दुर्गा मैयाँ कि जय बोल" देवी गीत सार्वजनिक

सुस्ता । पश्चिम नवलपरासीको जी.आई. भोजपुरियाले नेपालीहरूको महान पर्व बडा दशैंलाई लक्षित गरी भक्तिपूर्ण देवी गीत "दुर्गा मैयाँ कि जय बोल" सार्वजनिक गरेको छ। नव दुर्गा पूजा समिति, सरावल ०२ पटखौलीको सहकार्य र जी.आई. भोजपुरियाको निर्माणमा तयार पारिएको यस गीतले हिन्दू धर्मावलम्बीहरूको आदिशक्ति दुर्गा भवानीप्रतिको प्रेम र भक्तिलाई सुन्दर ढंगले चित्रण गर्दछ ।

नवलपरासीमा चर्चित गायक ईश्वर चौधरी र गायिका नेहा राजको स्वर रहेको यस गीतमा अनिल कुसुमको शब्द, सरबिन्दको संगीत रहेको छ। गीतको भिडियोमा मुख्य कलाकार मानसिंह चौधरी र सबिना मगरको अभिनयले सबैलाई आकर्षित गरेको छ। राकेश राजले छायांकन गरेको यस भिडियोको निर्देशन सागर परियारले गरेका हुन् ।

निर्माता गोविन्द चौधरीका अनुसार जी.आई. भोजपुरियाले यसअघि पनि थारु र भोजपुरी लगायत विभिन्न भाषामा दर्जनौं सफल गीतहरू सार्वजनिक गरिसकेको छ। उनले अब आउने गीतहरू पनि अझ उत्कृष्ट रहने र पर्यटकिय क्षेत्रको प्रवर्द्धन गर्ने गरि छायांकन गरिने जानकारी दिए। सरावल ०२ पटखौलीका स्थायी बासिन्दा चौधरीले आफूले पहिलो पटक थारु गीत गाए पनि सबै जातजातिको भाषा र गीतलाई समान रूपले माया गर्दै आएको बताए ।

चौधरीले वर्तमान अवस्थामा नेपाली, थारु र भोजपुरी भाषाका गीत संगीतले राम्रो बजार पाएको बताउँदै ग्रामीण क्षेत्रका कलाकाहरूलाई अवसर प्रदान गर्न जी.आई. भोजपुरिया सधैं अग्रसर रहने प्रतिबद्धता व्यक्त गरे। "दुर्गा मैयाँ कि जय बोल" गीत जी.आई. युट्युब च्यानलबाट हेर्न सकिनेछ ।