भैरहवा । रुपन्देहीको ओमसतिया गाउँपालिकामा आजदेखि दुईदिने राष्ट्रिय भिटामिन 'ए' कार्यक्रम सुरु भएको छ ।गाउँपालिकाका उपाध्यक्ष सुनिता चौधरीले अभियानको अनुगमन गर्दै सम्पूर्ण बालबालिकालाई भिटामिन 'ए' खुवाउन आग्रह गर्नुभएको छ ।
आज र भोलि (कार्तिक २० र २१ गते) ओमसतियाका ६ वटै वडाका स्वास्थ्य संस्थाहरूमार्फत ७५ जना स्वास्थ्य स्वयंसेविकाहरूले ३,४२५ जना बालबालिकालाई भिटामिन 'ए' क्याप्सुल, जुकाको औषधि र बालबिटा खुवाउने कार्यक्रम रहेको जनस्वास्थ्य अधिकृत दीपक ज्ञवालीले जानकारी दिनुभयो ।
अभियानको पहिलो दिन उपाध्यक्ष चौधरीले वडा नम्बर १, २ र ३ मा पुगी अनुगमन गर्नुभएको थियो। उहाँले यस अभियानलाई सफल बनाउन दिनरात खटिने महिला स्वास्थ्य स्वयंसेविकाहरूसँग भेट गरी उनीहरूका समस्या बुझ्नुका साथै आगामी दिनमा थप सुधार गर्ने प्रतिबद्धता व्यक्त गर्नुभयो । उपाध्यक्ष चौधरीले भन्नुभयो, "भिटामिन 'ए' खुवाउन कोही पनि नछुटुन्, यसलाई थप प्रभावकारी बनाउन हामी आफैं खटेका छौं । म जनताको बीचमा रहेको छु । हाम्रो पूरै स्वास्थ्य शाखा टिम नै टोलटोलमा पुगी यसबारे जानकारी लिइरहेका छौं ।"
अनुगमनमा नर्सिङ अधिकृत सस्मिता खत्रीको पनि सहभागिता रहेको थियो । उपाध्यक्ष चौधरीले ६ महिनादेखि ५ वर्ष मुनिका बालबालिकाहरूलाई भिटामिन 'ए' र १ वर्षदेखि ५ वर्ष मुनिका बालबालिकाहरूलाई जुकाको औषधि खुवाउनका लागि सम्पूर्ण अभिभावकहरूलाई हार्दिक अनुरोध गर्नुभएको छ ।
