अर्घाखाँची । अर्घाखाँचीको छत्रदेव गाउँपालिकामा जीप दुर्घटना हुँदा ९ जना घाइते भएका छन् । घाइतेमध्ये एक जनाको अवस्था गम्भीर रहेको छ ।
जिल्ला प्रहरी कार्यालय अर्घाखाँचीका प्रहरी निरीक्षक झलकप्रसाद शर्माका अनुसार, छत्रदेव गाउँपालिका-७ ढिकुराबाट बुटवलतर्फ जाँदै गरेको लु १ ज ४३५२ नम्बरको जीप छत्रदेव गाउँपालिका-५ को दोहोरो चौपारीमा दुर्घटनामा परेको हो ।
प्रारम्भिक अनुसन्धानअनुसार जीपको ब्रेक फेल भई पक्की सडकमा अनियन्त्रित हुँदा दुर्घटना भएको हो ।
दुर्घटनामा गम्भीर घाइते भएका ७० वर्षीय भोजराज भुषाललाई जिल्ला अस्पताल अर्घाखाँचीमा सामान्य उपचारपछि थप उपचारका लागि लुम्बिनी प्रादेशिक अस्पताल बुटवल रिफर गरिएको छ । अन्य आठ जना घाइतेहरुको अर्घाखाँची अस्पतालमा उपचारपछि घर पठाइएको शर्माले जानकारी दिए ।
