लुम्बिनी । नेपालमा शान्ति तथा सुरक्षाको कामना र जेन्जी आन्दोलनमा ज्यान गुमाएकाहरूको सुगति तथा घाइतेहरूको शीघ्र स्वास्थ्य लाभको कामना गर्दै आइतबार साँझ लुम्बिनीमा शान्ति एवं सुगति पाठ गरिएको छ ।
लुम्बिनीको मायादेवी मन्दिर परिसरमा आयोजित यस विशेष पाठमा विभिन्न भिक्षु, लामा, आनी, गुरुमा र विभिन्न क्षेत्रका व्यक्तिहरूको उल्लेख्य सहभागिता रहेको संयोजक डा. माणिक रत्न शाक्यले जानकारी दिनुभयो। डा. शाक्यका अनुसार, गत भदौ २३ र २४ गते भएको आन्दोलनमा ज्यान गुमाएकाहरूको सुगतिको कामना गरिएको थियो भने घाइतेहरूको शीघ्र स्वास्थ्य लाभको लागि पनि प्रार्थना गरिएको थियो।
यसका साथै, आन्दोलनपछि देशमा देखिएको अन्योलताको अवस्थाको अन्त्य भई दिगो शान्ति र सुरक्षा कायम होस् भन्ने कामना पनि गरिएको छ। यस शान्ति पाठले देशमा विद्यमान अशान्ति र असमझदारी हटाई सबैमा सद्भाव कायम होस् भन्ने सन्देश दिएको छ।
