काठमाडौँ । चालु आर्थिक वर्षमा सरकारले तीनवटा प्रसारण लाइन निर्माणका लागि अनुमति दिएको छ, जसमा भेरी करिडोरको बिजुली राष्ट्रिय प्रणालीमा जोड्ने ७५ किलोमिटर लामो ४०० केभी क्षमताको नलगाड मैनताडा प्रसारण लाइन प्रमुख छ। यो प्रसारण लाइनले २४०० मेगावाट बिजुली प्रवाह गर्न सक्नेछ, जसको निर्माण राष्ट्रिय प्रसारण ग्रीड कम्पनीले गर्दैछ ।
यसका साथै, ३३ केभी क्षमताका खोरुङगा खोला प्रसारण लाइन (४.३८ किलोमिटर, ४.८ मेगावाट क्षमता) र सुपर सर्दी खोला हाइड्रोपावरको प्रसारण लाइन (३.६८ किलोमिटर, २.९ मेगावाट क्षमता) ले पनि निर्माण अनुमति पाएका छन्। यी दुवै प्रसारण लाइन जलविद्युत् आयोजनाबाट उत्पादित बिजुली राष्ट्रिय प्रणालीमा जोड्नका लागि महत्वपूर्ण छन् ।
विद्युत् विकास विभागले हालसम्म कुल २७४ वटा प्रसारण लाइन निर्माणका लागि अनुमति प्रदान गरिसकेको छ । चालु आवमा आठ प्रसारण लाइनका लागि सर्वेक्षण अनुमति पनि दिइएको छ, जसमा १३२ केभी क्षमताका मध्य चमेलिया, फालेखु खोला, जानकी सोलार पावर, डाँडाँखेती बुर्तीबाङ र सानी भेरी लगायतका परियोजनाहरू छन् । कुल १४४ प्रसारण लाइनले सर्वेक्षण अनुमति पाइसकेका छन् भने चालु आवमा ११ वटासहित २१ प्रसारण लाइनको सर्वेक्षण अनुमतिका लागि आवेदन परेको छ ।
