गुल्मी । गुल्मीमा मुसा मार्न प्रयोग हुने विषादी सेवनका कारण एक बालिकाको ज्यान गएको छ । जिल्लाको इस्मा गाउँपालिका वडा नम्बर १ ठाटिकाचौरकी ४ वर्षीय प्रिन्सा सुनारको ज्यान गएको हो । विषादी दुई जना बालबालिकाले सेवन गरेका जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक (डिएसपी) शंकर पोखरेलले जानकारी दिनुभयो ।
स्थानीय सपना सुनारकी ४ वर्षीय छोरी प्रिन्सा सुनार र बसुन्धरा सुनारकी ५ वर्षीय छोरी दिपसिखा सुनारले मुसा मार्न प्रयोग हुने विषादी सेवन गरेका हुन् । सपना र बसुन्धराले आफ्ना छोरीहरुलाई बारीमा कोदो रोप्नको लागि भन्दै झार गोड्न सँगै लिएका गएका पोखरेलले जानकारी दिनुभएको छ । दुबै जनाले आफ्ना छोरीहरुलाई बारीको छेउमा राखी झार गोड्न थालेका समयमा बालिकाहरुले नाम नखुलेको मुसा मार्न प्रयोग हुने विषादी सेवन गरेका थिए ।
विषादी सेवन गरेका बालिकाहरुले वान्ता गर्न थालेपछि दुवै जनालाई उपचारको लागि स्थानिय मेडिकलमा लगिएको थियो । थप उपचारको लागि गुल्मी अस्पताल तम्घासमा गुल्मीमा ल्याएकोमा उपचारको क्रममा प्रिन्सालाई डाक्टरले मृत घोषणा गरेका थिए । दिपसिखालाई भने थप उपचारको लागि गुल्मी अस्पतालले लुम्बिनी मेडिकल कलेज प्रभास पाल्पा रिफर गरेको छ । बालिकाको उपचार भइरहेको प्रहरीले जनाएको छ ।
