काठमाडौँ । पूर्वराजा ज्ञानेन्द्र शाहले ७४औँ राष्ट्रिय प्रजातन्त्र दिवसका अवसरमा देश तथा विदेशमा रहेका सम्पूर्ण नेपालीलाई शुभकामना दिँदै प्रजातन्त्र स्थापनाका लागि जीवन आहुति दिने ज्ञात–अज्ञात सहिदहरूप्रति श्रद्धाञ्जली अर्पण गर्नुभएको छ ।दिवसका अवसरमा एक भिडियो सन्देश जारी गर्दै पूर्वराजा शाहले मुलुकमा बढ्दै गएको गरिबी र अस्थिरता नै नेपालको मुख्य शत्रु रहेको औँल्याउनुभएको छ । उहाँले देशको वर्तमान अवस्थाप्रति गम्भीर चिन्ता व्यक्त गर्दै विगतका राजनीतिक परिवर्तनहरूको निर्मम समीक्षा गर्नुपर्ने बेला आएको बताउनुभयो ।
सन्देशमा पूर्वराजा शाहले भन्नुभएको छ, “विगतमा भएका आन्दोलन र सङ्घर्षले ल्याएका परिवर्तनले देश र जनतालाई वास्तवमा के दियो भन्ने आत्मसमीक्षा गर्ने बेला आएको छ ।”उहाँले समाजमा अधिकार मात्र खोज्ने तर कर्तव्य नसोच्ने प्रवृत्ति मौलाउँदै गएकोमा असन्तुष्टि व्यक्त गर्नुभयो । यस्तो प्रवृत्तिले राष्ट्रलाई फाइदा नपुग्ने भन्दै उहाँले सबै पक्षलाई गम्भीर भएर सोच्न आग्रह गर्नुभएको छ । पूर्वराजा शाहले राष्ट्रिय एकतामा जोड दिँदै नेपाली–नेपाली बीचको द्वेष अन्त्य हुनुपर्ने बताउनुभयो । उहाँले एउटा नेपालीले अर्को नेपालीलाई वैरी ठान्ने संस्कृतिको अन्त्य हुनुपर्नेमा विशेष जोड दिनुभएको छ ।
