भैरहवा । चाडपर्वको चहलपहल बढिरहँदा सम्भावित आपराधिक घटनाहरूबाट सर्वसाधारणलाई सुरक्षित राख्न रुपन्देही प्रहरीले बिहीबार 'सेक्युरिटी एडभाइजरी' जारी गरेको छ। जिल्ला प्रहरी कार्यालय रुपन्देहीले एक विज्ञप्तिमार्फत १५ बुँदे सुरक्षा सल्लाह जारी गर्दै सभ्य र सुरक्षित तरिकाले चाडपर्व मनाउन सबैलाई आग्रह गरेको हो।
प्रहरीले चाडपर्वको समयमा विशेष सावधानी अपनाउनुपर्नेमा जोड दिएको छ। जारी एडभाइजरीमा घर तथा कोठा छाडेर लामो समय बाहिर जाँदा झ्याल ढोका राम्ररी बन्द गर्न र विश्वासिलो छिमेकीलाई जानकारी गराउन भनिएको छ। यसका साथै, व्यक्तिगत क्रियाकलाप तथा यात्रा योजना जस्ता संवेदनशील जानकारी सामाजिक सञ्जालमा सार्वजनिक नगर्न र सामाजिक सञ्जालको प्रयोगमा सचेतना अपनाउन आग्रह गरिएको छ।
घर तथा टोलको सुरक्षाका लागि सामूहिक पहल गर्न पनि प्रहरीले आह्वान गरेको छ। टोलवासी मिलेर सीसीटीभी क्यामेरा, सेक्युरिटी साइरन जस्ता सुरक्षाका उपकरणहरू जडान गर्न र आपसी समन्वयमा सुरक्षा व्यवस्था सुदृढ पार्न एडभाइजरीमा उल्लेख छ।
जिल्ला प्रहरी कार्यालय रुपन्देहीले कुनै पनि सूचना, सहयोग वा जानकारीका लागि प्रहरी कन्ट्रोल रुमको नम्बर १००, ९८५७०९०६२२ र ९८५७०४९३४२ मा सम्पर्क गर्न अनुरोध गरेको छ। चाडपर्वको यस घडीमा सबै मिलेर सुरक्षित र सौहार्दपूर्ण वातावरण कायम गर्न प्रहरीले सर्वसाधारणसँग सहकार्यको अपेक्षा गरेको छ।
