परासी । नवलपरासी उद्योग वाणिज्य संघका वरिष्ठ उपाध्यक्ष नगेन्द्र अग्रहरीले जिल्लामा सहज र सुविधायुक्त औद्योगिक वातावरणका कारण उद्योगीहरूको आकर्षण बढेको बताउनुभएको छ । परासी प्रेस क्लबले बुधबार आयोजना गरेको साक्षात्कार कार्यक्रममा बोल्दै अग्रहरीले नवलपरासी पूर्वपश्चिम राजमार्गसँग जोडिएको, पर्याप्त जग्गा उपलब्ध भएको, भन्सार र विद्युत सुविधा तथा सस्तो जग्गा मूल्यका कारण लगानीका लागि आकर्षक गन्तव्य बनेको उल्लेख गर्नुभयो।
जिल्लामा बहुराष्ट्रिय ठूला तथा मझौला उद्योगहरूको स्थापना बढ्दै गएको र यसले ९० प्रतिशत स्थानीयलाई रोजगारी दिएको उहाँको दाबी छ। औद्योगिक हबका रूपमा विकसित हुँदै गएको नवलपरासीमा उद्योग सञ्चालनलाई सहज बनाउन उद्योग वाणिज्य संघले पहल गरिरहेको अग्रहरीले बताउनुभयो।
यद्यपि, ठूला उद्योगहरू खुल्ने क्रम बढ्दै जाँदा घरेलु तथा साना उद्योगहरू भने बन्द हुने अवस्थामा पुगेका छन्। कोभिड महामारीपछिको आर्थिक मन्दी र बैंकको चर्को ब्याजदर (१८ प्रतिशतसम्म) का कारण साना उद्योगहरू मारमा परेको उहाँले औंल्याउनुभयो। अग्रहरीले ब्याज घटाएर थप कर्जा उपलब्ध गराई साना उद्योगहरूलाई सञ्चालन गर्ने वातावरण बनाउन सरकारसँग उद्योग वाणिज्य संघले पहल गरिरहेको जानकारी दिनुभयो।
