परासी । दर्ता नै नगरी नवलपरासीमा मेनपावर चलाउने दुई भारतीय नागरिक पक्राउ परेका छन् । नवलपरासी रामग्राम नगरपालिका– ५ बाईपासमा विनादर्ता जेडी मेनपावर सर्भिसेज चलाउने रबिन्द्र राणे र जावेद मसिहलाई जिल्ला प्रहरी कार्यालय नवलपरासीले पक्राउ गरेको हो ।
दुवै जना भारतको मुम्बईका बासिन्दा हुन्। उनीहरुले बैदेशिक रोजगारीका लागि रसिया, अस्ट्रेलिया, ईटालीलगायतका देशहरुमा लैजाने भन्दै प्रचार गरेका थिए ।
श्रम तथा रोजगार कार्यालय बुटवलसंगको समन्वयमा उनीहरुलाई पक्राउ गरी उक्त कार्यालयको बोर्ड हटाई सिल गरिएको नवपरासीका प्रहरी उपरीक्षक (एसपी) ज्ञानेन्द्रप्रसाद फुँयालले जानकारी दिए । दुवैमाथि थप अनुसन्धान र कारबाहीका लागि कार्यालयबाट बरामद सामानसहित प्रहरीले श्रम तथा रोजगार कार्यालय बुटवल पठाएको छ ।
