नवलपरासी । जिल्ला प्रहरी कार्यालय, नवलपरासी (बर्दघाट सुस्ता पश्चिम) ले हराएको एक मोटरसाइकल फेला पारी सम्बन्धित धनीलाई जिम्मा लगाएको छ । जिल्लाको सरावल गाउँपालिका–४ का श्रीराम यादवले आफ्नो लु ४७ प २४३० नम्बरको सुपर स्प्लेन्डर मोटरसाइकल रामग्राम नगरपालिका–५ स्थित पोखरापाली सडक खण्डमा पार्किङ गरी राखेको अवस्थामा हराएको भन्दै जिल्ला प्रहरी कार्यालयमा निवेदन दिएका थिए ।
निवेदन प्राप्त हुनासाथ खोजी कार्यलाई तीव्रता दिएको प्रहरीले जानकारी दिएको छ । जिल्ला प्रहरी कार्यालयका सूचना अधिकारी तथा प्रहरी नायव उपरीक्षक (डीएसपी) वीर दत्त पन्तका अनुसार, निवेदनका आधारमा खटिएको प्रहरी टोलीले खोजी गर्ने क्रममा उक्त मोटरसाइकल रामग्राम नगरपालिका–७, उजैनीस्थित सडक किनारमा बेवारिसे अवस्थामा फेला पारेको थियो । फेला परेको मोटरसाइकललाई कार्यालयमा ल्याई आवश्यक प्रक्रिया पूरा गरी धनी श्रीराम यादवलाई बुझाइएको डीएसपी पन्तले बताउनुभयो ।
