मर्चवार । रुपन्देहीको कोटहीमाई गाउँपालिका वडा नं. ५ स्थित सशस्त्र प्रहरी बल नेपाल बोर्डर आउट पोष्ट मझगावामा कार्यरत सशस्त्र प्रहरी जवान याम बहादुर खत्रीलाई १५ हजार रुपैयाँ घुस लिँदै गर्दा अख्तियार दुरुपयोग अनुसन्धान आयोगले पक्राउ गरेको छ।
खत्रीले भारतबाट भन्सार छली अवैधरुपमा कपडा र किराना सामान ल्याउन सहयोग गरिदिने भन्दै सेवाग्राहीसँग घुस मागेको सूचना र उजुरीको आधारमा अख्तियार दुरुपयोग अनुसन्धान आयोगको कार्यालय, बुटवलबाट खटिएको टोलीले उनलाई नियन्त्रणमा लिएको हो।
अख्तियारका प्रवक्ता राजेन्द्र कुमार पौडेलका अनुसार, खत्रीलाई घुस रकमसहित रंगेहात पक्राउ गरी थप अनुसन्धान भइरहेको छ।
