सन्धिखर्क । अर्घाखाँचीको सन्धिखर्क नगरपालिका वडा नं. ७ मा सरुवा रोग रोकथाम तथा नियन्त्रण सम्बन्धी एकदिने अभिमुखीकरण कार्यक्रम सम्पन्न भएको छ। स्वास्थ्य कार्यालय, अर्घाखाँचीको आयोजनामा भएको सो कार्यक्रममा महिला स्वास्थ्य स्वयंसेविका तथा अन्य सरोकारवालाहरूलाई डेङ्गु, कोरोना जस्ता सरुवा रोगबाट बच्ने उपायबारे प्रशिक्षण दिइएको थियो।
कार्यक्रममा जिल्ला स्वास्थ्य कार्यालयका जनस्वास्थ्य निरीक्षक गणेशराज पौडेलले गर्मीयाममा फैलिन सक्ने सरुवा रोगका लक्षण, रोकथाम र नियन्त्रणका उपायहरूबारे सहजीकरण गर्नुभएको थियो। उहाँले टोल विकास संस्थाहरूलाई सरसफाइ र स्वास्थ्य सचेतनामा सक्रिय भई आफ्नो समुदायलाई रोगबाट बचाउन आग्रह गर्नुभयो।
त्यसैगरी, जिल्ला स्वास्थ्य कार्यालयका प्रमुख कृष्णप्रसाद पौडेलले गर्मीमा रोगको प्रकोप बढ्ने भएकाले यस्ता सचेतनामूलक कार्यक्रमले रोकथाममा महत्त्वपूर्ण भूमिका खेल्ने बताउनुभयो। वडा अध्यक्ष चुरा बहादुर केसीको अध्यक्षता र स्वास्थ्य चौकी प्रमुख प्रेमचन्द विकको सञ्चालनमा सम्पन्न कार्यक्रममा वडा सचिव, स्वास्थ्यकर्मी, सञ्चारकर्मी लगायतको उपस्थिति रहेको थियो।
