परासी । पश्चिम नवलपरासीको रामग्राम नगरपालिकाले सदरमुकाम परासीस्थित भुमही–भैरहवा बाइपास सडकमा अत्याधुनिक 'अटोमेटिक नम्बर प्लेट रिकग्निसन सिस्टम' (एएनपिआर) क्यामरा जडान गरेको छ। सवारी दुर्घटना न्यूनीकरण गर्ने र सवारी साधनको पहिचान सहज बनाउने उद्देश्यले उक्त क्यामरा जडान गरिएको हो।
यो क्यामेराले सडकमा गुड्ने सवारी साधनको नम्बर प्लेट र गति स्वतः पहिचान गरी स्वचालित रूपमा अभिलेख राख्नेछ। नगर प्रमुख धनपत यादवका अनुसार, दुर्घटनापछि सवारी साधन पहिचान गर्न र शान्ति सुरक्षा कायम गर्न यो प्रविधिले प्रहरीलाई अनुसन्धानमा ठूलो सघाउ पुग्नेछ। उहाँले 'स्मार्ट सिटी' अवधारणाअन्तर्गत आधुनिक प्रविधिको प्रयोगलाई बढवा दिइएको पनि बताउनुभयो।
त्यसैगरी, जिल्ला प्रहरी कार्यालयका सूचना अधिकारी विरदत्त पन्तले यो प्रविधिले अपराध अनुसन्धान, सवारीको गति नियन्त्रण र दुर्घटनापछि फरार हुने सवारी साधनको खोजीमा मद्दत पुग्ने विश्वास व्यक्त गर्नुभयो। क्यामेराको निगरानी जिल्ला प्रहरी कार्यालयबाटै हुने र केही प्राविधिक काम सम्पन्न हुन बाँकी रहेको नगरपालिकाले जनाएको छ।
