रुपन्देही । जिल्ला प्रहरी कार्यालय रुपन्देहीले जिल्लाका विभिन्न स्थानबाट करिब ६ लाख रुपैयाँ बराबरको अवैध सामान बरामद गरेको छ । भदौ ५ र ६ गते गरिएको चेकजाँचका क्रममा भन्सार छली चोरी पैठारी गरी ल्याइएका सामानहरु प्रहरीले नियन्त्रणमा लिएको हो ।
जिल्ला प्रहरी कार्यालय रुपन्देहीका सूचना अधिकारी डिएसपी सुरज कार्कीका अनुसार, बरामद गरिएका सामानहरुमा बोइलर कुखुरा, लेडिज सुट, रेडबुल, चश्मा, दैनिक उपभोग्यका सामान, कुखुराको मासु र वायरिङका तार रहेका छन् । प्रहरीले अवैध सामान ओसारपसारमा संलग्न एक जनालाई पनि पक्राउ गरेको छ ।
प्रहरीका अनुसार, सिद्धार्थनगर नगरपालिकाको गल्लामण्डी, बेलहिया बसपार्क र बसडिलवा, ओमसतिया गाउँपालिकाको पड्सरी, रोहिणी गाउँपालिकाको खुरहुरिया तथा लुम्बिनी साँस्कृतिक नगरपालिकाको कचरिहवाबाट उक्त परिमाणको सामान बरामद गरिएको हो ।
बरामद गरिएका सामानहरु आवश्यक कारबाहीका लागि भैरहवा भन्सार कार्यालय र पशु क्वारेन्टाइन कार्यालय बेलहियामा बुझाइएको छ । प्रहरीले ओमसतियाबाट सामानसहित सियारी गाउँपालिका–६ का ४० वर्षीय वैश मम्महदलाई नियन्त्रणमा लिएको हो । घटनामा प्रयोग भएका तीनवटा मोटरसाइकल पनि प्रहरीले बरामद गरेको छ ।
