पाल्पा । वर्षाका कारण हुनसक्ने सम्भावित बाढी तथा पहिरोको जोखिमलाई मध्यनजर गर्दै सिद्धार्थ राजमार्गको दोभान-सिद्धबाबा सडकखण्डमा रातिको समयमा सवारी आवागमन रोक लगाइएको छ । जिल्ला प्रशासन कार्यालयले आजदेखि असोज १२ गतेसम्म बेलुकी ७ः०० बजेदेखि बिहान ५ः०० बजेसम्म सवारी रोक्ने निर्णय गरेको हो ।
यात्रु तथा सवारीसाधनको सुरक्षालाई प्राथमिकतामा राख्दै जोखिम न्यूनीकरणका लागि यो निर्णय गरिएको सहायक प्रमुख जिल्ला अधिकारी राजेश पन्थीले जानकारी दिनुभयो । उहाँले एक सूचना जारी गर्दै हालको मौसममा आएको परिवर्तनका कारण पाल्पा जिल्लामा निरन्तर वर्षा भइरहेको र आगामी केही दिनसम्म भारी वर्षा हुनसक्ने नेपाल मौसम विज्ञान विभागको सूचनालाई मध्यनजर गर्दै यात्रु तथा सवारीसाधनको सुरक्षा सुनिश्चित गर्न राति सवारी आवागमन बन्द गरिएको उल्लेख गर्नुभयो ।
प्रशासनले वर्षाका कारण सडकमा पहिरो, बाढी तथा डुबानलगायत विपद्जन्य जोखिम उत्पन्न हुनसक्ने भएकाले रातिको समयमा यात्रा नगर्न सर्वसाधारणलाई आग्रहसमेत गरेको छ । आपत्कालीन अवस्थामा नेपाल प्रहरी १००, ट्राफिक प्रहरी १०३, सशस्त्र प्रहरी बल १११४ र जिल्ला आपत्कालीन केन्द्र १२३४ मा सम्पर्क गर्न सकिने सूचनामा उल्लेख छ । बितेको २४ घण्टामा पाल्पाको बल्ड्याङगढीमा सबैभन्दा बढी १६१ मिलिमिटर वर्षा भएको मौसम विज्ञान विभाग, मौसम पूर्वानुमान महाशाखाले जनाएको छ । यस्तै यहाँका स-साना खोलामा पानीको बहाव उल्लेख्य बढ्ने सम्भावना समेत रहेको छ ।
