भैरहवा । सरकारले लागू गरेको आन्तरिक मूल्याङ्कन प्रणालीलाई प्रभावकारी र व्यवहारिक बनाउन प्याब्सन मायादेवी रुपन्देहीले भैरहवामा एकदिने शिक्षक तालिम आयोजना गरेको छ। कक्षा ४ र ५ मा अध्यापनरत १५ विद्यालयका ८५ जना शिक्षक सहभागी उक्त तालिममा निरन्तर मूल्याङ्कन, ग्रेडिङ प्रणाली र सिकाइ अभिलेखीकरणबारे व्यवहारिक प्रशिक्षण दिइएको थियो।
प्याब्सन तिलोत्तमाका सचिव चन्द्र अधिकारीले सहजीकरण गर्नुभएको सो कार्यक्रममा वक्ताहरूले परीक्षा र अंकमा मात्र सीमित नभई विद्यार्थीको व्यवहार, सहभागिता र सिकाइ प्रक्रियाका आधारमा मूल्याङ्कन गर्नुपर्नेमा जोड दिएका थिए। तालिमले मूल्याङ्कन कार्यान्वयनमा देखिएका अन्योल हटाई शिक्षण गुणस्तर सुधार्न सहयोग पुग्ने सहभागी शिक्षकहरूले बताएका छन्।
