दार्चुला । आगामी साउन ८ र १२ गते भारतको उत्तराखण्ड प्रदेशमा हुने पञ्चायत निर्वाचनको सुरक्षाका लागि नेपालका दार्चुला र बैतडी जिल्लालाई भारतसँग जोड्ने झोलुङ्गे पुलहरू ७२ घण्टाका लागि बन्द गरिने भएको छ । भारतको पिथौरागढमा भएको नेपाल-भारत समन्वय बैठकमा यो निर्णय भएको हो ।
दार्चुलाका प्रमुख जिल्ला अधिकारी अनिल पौडेलका अनुसार, दार्चुलातर्फका सीमा पुलहरू साउन ५ गते बेलुकीदेखि साउन ९ गते बिहानसम्म बन्द हुनेछन् । त्यस्तै, बैतडीको झुलाघाटस्थित झोलुङ्गे पुल साउन ९ गते बेलुकीदेखि साउन १२ गते बिहानसम्म बन्द रहनेछ ।
पिथौरागढका जिल्ला अधिकारी विनोद गोस्वामीले निर्वाचनलाई स्वच्छ, निष्पक्ष र सुरक्षित वातावरणमा सम्पन्न गर्न सीमानाका बन्द गर्ने सहमति भएको बताउनुभयो । बैठकमा दार्चुला र बैतडीका प्रमुख जिल्ला अधिकारीहरू तथा सुरक्षा निकायका प्रमुखहरू र भारतको पिथौरागढ जिल्लाका समकक्षीहरूको सहभागिता रहेको थियो ।
