मर्चवार । राष्ट्रिय बाल दिवसको अवसरमा रुपन्देहीको मर्चवारीमाई गाउँपालिका–६ हणसरीस्थित श्रीराम गुरुकुल शिक्षालयले विभिन्न टोलहरूमा प्रभातफेरी कार्यक्रम आयोजना गरेको छ। गुरुकुलमा अध्ययनरत करिब ७० जना विद्यार्थी, अभिभावक, जनप्रतिनिधि, शिक्षक तथा सुरक्षाकर्मीको सहभागितामा निकालिएको प्रभातफेरी हणसरी टोल र फुलवरिया चोक हुँदै पुनः गुरुकुल परिसरमा पुगेर समापन भएको थियो। मर्चवार क्षेत्रमा गुरुकुल शिक्षाको सुरुवातसँगै पहिलोपटक बाल दिवसका अवसरमा यस्तो कार्यक्रम आयोजना गरिएको मर्चवारीमाई गाउँपालिका–६ का वडाध्यक्ष रामसेवक खरबिन्दले जानकारी दिनुभयो।
वडाध्यक्ष खरबिन्दका अनुसार स्थानीय ठर्की माध्यमिक विद्यालय टाढा रहेको र अन्य मदरसाहरूमा हिन्दु बालबालिकालाई पठनपाठनमा सहज वातावरण नभएपछि वडा कार्यालयको अगुवाइमा चालु शैक्षिक वर्षदेखि यो गुरुकुल स्थापना गरिएको हो। हाल तीन जना शिक्षक र एक जना धार्मिक आचार्यमार्फत बालबालिकालाई औपचारिक शिक्षाका साथै संस्कार, अनुशासन र नैतिक शिक्षा प्रदान गरिँदै आएको छ।
