सन्धिखर्क । जिल्ला स्वास्थ्य कार्यालय अर्घाखाँचीले जिल्लाका सामुदायिक तथा संस्थागत विद्यालयमा अध्ययनरत १० देखि १९ वर्षसम्मका छात्राहरुको रक्तअल्पता (एनिमिया) परीक्षण तथा व्यवस्थापन कार्यक्रम सुरु गरेको छ ।
लुम्बिनी प्रदेश सरकारको प्राथमिकतामा रहेको यो कार्यक्रम सन्धिखर्क नगरपालिकाबाट थालिएको हो । स्वास्थ्य कार्यालयका प्रमुख कृष्णप्रसाद पोख्रेलका अनुसार सन्धिखर्कका जनता कृष्ण मावि र चन्द्र प्रभा माविमा गरी करिब २ सय जना छात्राको रगत परीक्षण गरिएको छ ।
प्रारम्भिक नतिजा अनुसार परीक्षण गरिएकामध्ये १२ प्रतिशत किशोरीहरूमा रक्तअल्पताको समस्या देखिएको छ । जिल्लाभरका विद्यालयहरूमा पुगेर करिब २ हजार ३ सय छात्राहरुको रगत परीक्षण गर्ने र रगतको कमी भएका किशोरीहरूलाई आइरन चक्की खुवाउने योजना रहेको प्रमुख पोख्रेलले जानकारी दिनुभयो।
