अर्घाखाँची । अर्घाखाँचीको पाणिनि गाउँपालिकामा ट्याक्टर दुर्घटना हुँदा चालक गम्भीर घाइते भएका छन्। सन्धिखर्कबाट गुल्मी जाँदै गरेको ट्याक्टर अनियन्त्रित भई सडकबाट तल खस्दा उक्त दुर्घटना भएको हो। सन्धिखर्कबाट गुल्मी तर्फ जाँदै गरेको लु ५ त १५० नम्बरको ट्याक्टर पाणिनि गाउँपालिका–८ पालीस्थित कोलडाँडामा दुर्घटनामा परेको हो ।
प्रहरीका अनुसार घुम्ती–पाल्पा सडकखण्डमा गुडिरहेको उक्त ट्याक्टर एक्कासि अनियन्त्रित भई करिब ५ सय मिटर तल दुर्गाफाँट–खज्र्याङ सडकमा खसेको थियो। दुर्घटनामा परी ट्याक्टरका चालक कपिलवस्तु जिल्लाको ओदारी निवासी पञ्चराम चौधरी गम्भीर घाइते भएका छन्। पाली प्रहरी चौकीले दिएको जानकारी अनुसार घाइते चौधरीको अवस्था चिन्ताजनक रहेको छ। उनलाई घटनास्थलबाट तत्काल उद्धार गरी थप उपचारका लागि बुटवल पठाइएको छ। दुर्घटनाको कारणबारे प्रहरीले थप अनुसन्धान गरिरहेको जनाएको छ।
