भैरहवा । शनिबारदेखि भैरहवामा जिल्लास्तरीय सुपर लिग क्रिकेट प्रतियोगिता हुने भएको छ । रुपन्देही क्रिकेट संघको आयोजनामा भैरहवा स्थित सिद्धार्थ रंगशालामा रुपन्देही सुपर लिग क्रिकेट प्रतियोगिता हुन लागेको संघका सचिव सञ्जय गुरुङ्गले बताए ।
प्रतियोगितामा जिल्लाका २० क्लबको सहभागिता रहनेछ । जसमा ए डिभिजनका ८ क्लब छन् भने बी डिभिजनका १२ क्लब छन् । प्रतियोगिताको सुरुमा बी डिभिजनका १२ क्लबबीच प्रतिस्पर्धा हुनेछ । त्यसबाट उत्कृष्ट दुई टिमलाई छनौट गरी ए डिभिजनका टिममा समावेश गरी १० टिमबीच सुपर लिगमा प्रतिस्पर्धा गराइने सचिव गुरुङ्गले बताए ।
प्रतियोगितामा विजेता क्लबले नगद १ लाख प्राप्त गर्ने छ भने उपविजेताले नगद ५० हजार प्राप्त गर्ने छ । यस्तै उत्कृष्ट खेलाडीले १५ हजार, बेष्ट बलर र बेष्ट ब्याट्स म्यान र उदयमान खेलाडीले नगद ५/५ हजार तथा प्रत्येक दिनको म्यान अफ द म्याचले एक हजार दुई सय रुपैयाँ प्राप्त गर्ने छन् ।
कार्तिक २४ देखि सुरु हुने प्रतियोगितामा बि डिभिजनका खेल खेलाईने र ए डिभिजनका खेलहरु नेपाल प्रिमियर लिग पछि मात्र खेलाईने संघका अध्यक्ष हरि बहादुर थापाले बताए । प्रतियोगिता सम्पन्न गर्न करिब १५ लाख खर्च लाग्ने अनुमान गरिएको छ ।
प्रतियोगिताका संयोजक एवम संघका कोषाध्यक्ष निरज प्रताप खाँणका अनुसार खेल ५० ओभरको हुनेछ भने प्रतियोगिता भर कुल ३१ वटा खेल हुनेछन् ।
२०५३ साल देखि सञ्चालित रुपन्देही सुपर लिग नेपालमै रुपन्देहीमा मात्र हुने गरेको र यस क्षेत्रको गौरवको रुपमा रहेको छ ।
