भैरहवा । प्रतिनिधि सभा निर्वाचनअन्तर्गत रुपन्देही क्षेत्र नम्बर १ बाट निर्वाचित राष्ट्रिय स्वतन्त्र पार्टी (रास्वपा) का सांसद सुनिल लम्सालले मतदातालाई धन्यवाद दिँदै विजयोत्सव र अबिर जात्रा नगर्ने घोषणा गरेका छन् । सामाजिक सञ्जाल फेसबुकमार्फत एक सन्देश जारी गर्दै उनले हालैको 'जेन जी' आन्दोलनका सहिदको सम्मानमा कुनै पनि प्रकारको उत्सव नमनाउने बताएका हुन् । जनताको मतले निर्वाचित भएको यो क्षणलाई आफूले जिम्मेवारीका रूपमा लिएको भन्दै उनले तुरुन्तै जनतामाझ पुगेर काम सुरु गर्ने स्पष्ट पारेका छन् ।
फेसबुकमा मतदातालाई सम्बोधन गर्दै उनले लेखेका छन्, ‘यो निर्वाचन Gen Z आन्दोलनको जगमा भएको परिवर्तनको संकेत पनि हो । त्यस आन्दोलनका सहिदहरूलाई सम्झँदै हामी कुनै उत्सव वा अबिर यात्रा गर्ने छैनौँ ।’ निर्वाचनमा प्राप्त विश्वास र समर्थनप्रति हृदयदेखि आभार व्यक्त गर्दै उनले देशमा व्याप्त भ्रष्टाचार, गैरजिम्मेवारीपन, बेरोजगारी र प्रशासनिक ढिलासुस्ती अन्त्य गर्न आफूहरुले हदसम्मको कठोरता अपनाउने चेतावनी दिएका छन् ।
विगतका सांसदहरु चुनाव जितेपछि काठमाडौं केन्द्रित हुने गरेको गुनासोलाई सम्बोधन गर्दै उनले रास्वपाका सांसदहरु आफ्नै निर्वाचन क्षेत्रमा बसेर काम गर्ने प्रतिबद्धता जनाएका छन् । ‘राष्ट्रिय स्वतन्त्र पार्टीका सांसदहरू अब काठमाडौँमा मात्र होइन, आफ्नै निर्वाचन क्षेत्रमा बसेर जनतामाझ रहँदै काम गर्नेछन्,’ उनले फेसबुकमा लेखेका छन् ।
नागरिकको दैनिक जीवनसँग जोडिएका सार्वजनिक सेवाहरूलाई चुस्त–दुरुस्त बनाउने र राज्यले सुनिश्चित गरेका अधिकारहरू छिटो, प्रभावकारी र सम्मानजनक ढंगले उपलब्ध गराउने उनको वाचा छ । जनप्रतिनिधिको हैसियतले जनताकै माझमा बसेर, जनताकै साथ र सहयोगमा देशलाई सुशासनको बाटोमा अगाडि बढाउने अठोट समेत उनले व्यक्त गरेका छन् ।
