मर्चवार । आगामी फागुन २१ गते हुने प्रतिनिधि सभा निर्वाचनलाई लक्षित गर्दै रुपन्देहीको मर्चवार क्षेत्रमा रहेका मतदान स्थलहरूको विस्तृत सुरक्षा अनुगमन गरिएको छ । जिल्ला प्रशासन कार्यालय रुपन्देहीका अनुसार, प्रमुख जिल्ला अधिकारी माधव प्रसाद पोखरेल संयोजकत्वको जिल्ला शान्ति–सुरक्षा समितिले मर्चवारी र सम्मरीमाई गाउँपालिकाका करिब १३ वटा मतदान स्थलको निरीक्षण गरेको हो ।
सहायक प्रमुख जिल्ला अधिकारी मातृका आचार्यले मतदान स्थलको भौतिक संरचना, सुरक्षा जोखिम र पहुँचयोग्यताको मूल्याङ्कन गरिएको जानकारी दिनुभयो । अनुगमनमा चारै सुरक्षा निकायका प्रतिनिधि, सम्बन्धित गाउँपालिकाका अध्यक्षहरू गया प्रसाद बरई र बिनोद कुमार श्रीवास्तव, प्रमुख प्रशासकीय अधिकृतहरू तथा स्थानीय सरोकारवालाहरूको सहभागिता थियो ।
टोलीले निर्वाचनलाई स्वच्छ, निष्पक्ष र भयरहित बनाउन सुरक्षा चुनौतीको पहिचान गर्दै आवश्यक रणनीति तय गरेको छ । जिल्लाका १६ वटै स्थानीय तहमा सुरक्षा अनुगमन जारी रहेको र संवेदनशील स्थानहरूमा विशेष सुरक्षा संयन्त्र अपनाइने प्रशासनले जनाएको छ ।
