भैरहवा । रुपन्देहीको भैरहवास्थित भीम अस्पतालकी मेडिकल सुपरिटेण्डेण्ट (मेसु) डा. शकुन्तला गुप्ताले पदभार ग्रहण गरेकी छन् । बुटवलस्थित लुम्बिनी प्रादेशिक अस्पतालबाट भीम अस्पतालमा सरुवा भएकी डा. गुप्ताले सोमबार पदभार ग्रहण गरेकी हुन् ।
सोमबार एक कार्यक्रमकाबीच उनलाई अस्पताल विकास समितिका अध्यक्ष डा. अनन्त कुमार शर्मा, अस्पतालमा कार्यरत चिकित्सक, स्वास्थ्यकर्मी तथा कर्मचारीले स्वागत तथा सम्मान गरेका हुन् ।
सोही कार्यक्रममा परासीस्थित पृथ्वीचन्द अस्पतालमा सरुवा भएका भीम अस्पतालका मेसु डा. मोहम्मद नुरुल होदालाई विदाई गरिएको थियो ।
कार्यक्रममा बोल्दै डा. गुप्ताले आफूले यसअघि भीम अस्पतालमा मेसुको जिम्मेवारी निर्वाह गरिसकेको र पुनः यहाँ आएको बताइन् । उनले भनिन्, ‘दोस्रोपटक यो अस्पतालमा जिम्मेवारी सम्हाल्दैछु । राम्रो वातावरण भए काम गर्न सहज हुन्छ । सबैको साथ र सहयोगको अपेक्षा राखेको छु । सहकार्य गर्दै अघि बढ्नुपर्छ ।’ उनले अस्पतालको विकास र जनतालाई कसरी राम्रो सेवा दिने भन्नेतर्फ लागिपर्ने बताइन् । उनले भनिन्, ‘म भीम अस्पतालमा काम गर्न आएको हुँ । ’
अस्पताल विकास समितिका अध्यक्ष डा. शर्माले डा. गुप्तालाई सफल कार्यकालको शुभकामना व्यक्त गरे । उनले पृथ्वीचन्द अस्पतालमा सरुवा भएका डा. होदालाई पनि सफल कार्यकालको शुभकामना व्यक्त गरे । उनले भने,‘ भीम अस्पतालको विकासका लागि सहकार्य गरेर अघि बढ्छौं ।
त्यस्तै डा. मोहम्मद नुरुल होदाले भने, ‘डा. शकुन्तला गुप्ताको कार्यकाल सफल रहोस् । कर्मचारीको सरुवा नियमित प्रक्रिया हो । स्वास्थ्य नै धन हो । आउने दिनमा पनि सौहार्दपूर्ण वातावरणमा काम गर्ने अवसर जुटनेछ । ’भीम अस्पतालका व्यवस्थापक छम बहादुर अधिकारी (सुरेन्द्र) को सञ्चालनमा कार्यक्रम सम्पन्न भएको थियो ।
