सन्धिखर्क । नेपाल विद्युत प्राधिकरण अर्घाखाँची वितरण केन्द्रले आफ्नो ४०औं वार्षिकोत्सव विभिन्न कार्यक्रमहरु आयोजना गरी भव्यताका साथ मनाएको छ । मूल समारोह समितिका अध्यक्ष तथा प्रशासन प्रमुख खिमराज आचार्यको अध्यक्षता र कार्यालय प्रमुख इन्जिनियर त्रिलोचन भट्टराईको प्रमुख आतिथ्यतामा सम्पन्न कार्यक्रममा पूर्व कर्मचारीहरु तथा निर्माण व्यवसायी लगायतको उपस्थिति रहेको थियो ।
कार्यक्रममा बोल्दै वितरण केन्द्रका प्रमुख इन्जिनियर भट्टराईले आफ्नो कार्यकालमा भएका गतिविधि र भावी योजनाहरुको बारेमा जानकारी गराउनुभएको थियो । उहाँले जिल्लाको विद्युत प्रणाली सुधार र सेवा प्रवाहलाई थप प्रभावकारी बनाउने प्रतिबद्धता व्यक्त गर्नुभयो ।
सो अवसरमा लुम्बिनी प्रादेशिक कार्यालयबाट उत्कृष्ट कर्मचारीको रुपमा पुरस्कृत हुनुभएका प्राविधिक प्रमुख प्रभात कुमार चौधरीलाई सम्मान गरिएको थियो । साथै, पूर्व कर्मचारीहरु पदम भुसाल, भोलानाथ पाण्डे, रोमलाल खनाल र निर्माण व्यवसायी जय दुर्गा कन्स्ट्रक्सनका दुर्गा बहादुर नेपालीलाई पनि उनीहरुको योगदानको कदर गर्दै सम्मान गरिएको थियो ।
वार्षिकोत्सव समारोहलाई थप मनोरञ्जनात्मक बनाउन कर्मचारीहरुबीच १० प्रकारका खेलकुद प्रतियोगिताहरु पनि आयोजना गरिएको थियो । प्रतियोगिताका विजेताहरुलाई पुरस्कार तथा प्रमाणपत्र प्रदान गरिएको थियो । कार्यक्रम लेखा प्रमुख झविन्द्र खनालको स्वागत मन्तव्यबाट सुरु भई शिवा पाण्डेको सञ्चालनमा सम्पन्न भएको थियो ।
