धकधई । राष्ट्रिय प्रजातन्त्र पार्टी (राप्रपा) का अध्यक्ष राजेन्द्रप्रसाद लिङ्देनले राष्ट्रहित र नागरिक अधिकारका लागि राप्रपाले कुनै सम्झौता नगर्ने दाबी गर्दै आफ्नो पार्टीलाई मतदान गरे पछुताउन नपर्ने बताएका छन्। रुपन्देहीको खैरेनी चोक र धकधई बजारमा आयोजित संकल्प यात्रा तथा कोणसभालाई सम्बोधन गर्दै उनले विगत ३० वर्षदेखि सत्तामा रहेका पुराना दलहरूले विभिन्न शासन व्यवस्थाको अभ्यास गरे पनि देशको अवस्था सुधार्न नसकेकाले अब गहिरिएर विचार गरेर मात्र मतदान गर्न नागरिकलाई आग्रह गरे।
रुपन्देही–१ का राप्रपा उम्मेदवार प्रज्जवल बोहराको प्रचारप्रसारका क्रममा पुगेका लिङ्देनले मुलुकलाई सम्भावित दुर्घटनाबाट बचाउन दल र राजाबीच तत्काल राष्ट्रिय समझदारी कायम हुनुपर्नेमा जोड दिएका छन्। २०८४ को चुनाव २०८२ मै गर्दैमा देशको समस्या समाधान नहुने भन्दै उनले राजा र दलबीचको सहकार्यका लागि शक्ति आर्जन गर्न राप्रपालाई जिताउन र युवा उम्मेदवार बोहराको पक्षमा मतदान गर्न अपिल गरेका हुन्।
