हेटौंडा । मकवानपुरको हेटौंडा उपमहानगरपालिका-१८ फुर्केचौरमा रोकिराखेको एक टिपरमा अचानक आगोलागी भएको छ। चालक र सहचालक चिया खाना गाडीबाट झरेको केही बेरमै बा.प्र.०३-००१ क ०१९६ नम्बरको खाली टिपरमा आगो लागेको प्रहरीले जनाएको छ।
आगोलागीको खबर प्राप्त हुनासाथ ठूलोदमार प्रहरी चौकीबाट प्रहरी नायब निरीक्षक रिमा कोईरालाको कमाण्डमा प्रहरी टोली घटनास्थल पुगेको थियो। आगोलागीबाट टिपरको अगाडिको भाग पूर्ण रूपमा जलेर नष्ट भएको छ। प्रहरीको प्रारम्भिक अनुसन्धान अनुसार, गाडीको वायरिङ सर्ट भएर आगो लागेको हुन सक्ने अनुमान गरिएको छ। घटनामा कुनै पनि मानवीय क्षति भने नभएको जिल्ला प्रहरी कार्यालय मकवानपुरले जानकारी दिएको छ। घटनाबारे थप अनुसन्धान भइरहेको प्रहरीले जनाएको छ।
