अर्घाखाँची । अर्घाखाँची जिल्लामा निर्वाचन शान्तिपूर्ण तवरले सम्पन्न भएको छ। मुख्य निर्वाचन अधिकृतको कार्यालयका अनुसार जिल्लाका सबै मतदान केन्द्रहरूमा कुनै पनि अप्रिय घटना विना शान्तिपूर्ण रूपमा मतदान कार्य सकिएको हो।यसपटकको निर्वाचनमा जिल्लामा कुल मतदाताको करिब आधाले मात्र मतदानमा सहभागिता जनाएका छन्। निर्वाचन कार्यालयले उपलब्ध गराएको तथ्याङ्क अनुसार जिल्लाभर रहेका कुल १ लाख ७१ हजार ६ सय ५२ मतदातामध्ये ८७ हजार ४ सय ५५ जनाले मात्र आफ्नो मताधिकार प्रयोग गरेका छन्। यो कुल मतदाता सङ्ख्याको ५०.९४९ प्रतिशत मात्र हुन आउँछ।
जिल्लाका सबै मतदान केन्द्रहरूमा शान्तिपूर्ण रूपमा मतदान सम्पन्न भएसँगै हाल मतपेटिकाहरू सङ्कलनको कार्य भइरहेको छ। मुख्य निर्वाचन अधिकृतको कार्यालयले जनाए अनुसार विभिन्न स्थानमा रहेका मतदान केन्द्रहरूबाट कडा सुरक्षा व्यवस्थाका बीच मतपेटिकाहरू जिल्ला सदरमुकाम सन्धिखर्क ल्याउने क्रम अहिले जारी छ। जिल्लाभरका सम्पूर्ण मतपेटिकाहरू सन्धिखर्क आइपुगेपछि आवश्यक तयारी पूरा गरी मतगणनाको थप प्रक्रिया अगाडि बढाइने कार्यालयले जनाएको छ।
