पाल्पा । सिद्धार्थ राजमार्गअन्तर्गत पाल्पाको तिनाउ गाउँपालिका–३ पैठेडाँडाबाट भन्सार छलीका विद्युतीय सामान र ईभी गाडीसहित दुई जनालाई प्रहरीले नियन्त्रणमा लिएको छ । पक्राउ पर्नेमा गाडी चालक स्याङ्जा वालिङका ३७ वर्षीय यामबहादुर सार्की र सामान धनी नवलपरासीका ३७ वर्षीय दिनेश दर्जी रहेका छन् । बुटवलबाट पोखरातर्फ जाँदै गरेको ग १ ख ०१९३ नम्बरको ईभी गाडीलाई प्रहरी चौकी दोभानको टोलीले जाँच गर्दा बिलभन्दा बढीका सामान भेटिएका हुन् ।
गाडीबाट टाटा कम्पनीका चार सेट एसी, आठ थान टिभी, एक थान एग्रो पेन रिलिफर र एक थान एलजी बारसाउन्ड गरी करिब रु चार लाख ७५ हजार बराबरका अवैध सामान बरामद गरिएको छ । नियन्त्रणमा लिइएका दुवै जनालाई गाडी र सामानसहित आवश्यक कारबाहीका लागि भैरहवा भन्सार कार्यालय बेलहिया पठाइएको जिल्ला प्रहरी कार्यालय पाल्पाका सूचना अधिकारी प्रहरी नायब उपरीक्षक भिमलाल भट्टराईले जानकारी दिनुभयो ।
