अर्घाखाँची । अर्घाखाँची आयुर्वेद स्वास्थ्य केन्द्रले बालबालिकाको स्वास्थ्य प्रवर्द्धन गर्ने उद्देश्यले आगामी चैत १४ गतेदेखि ‘स्वर्ण विन्दु प्राशन’ अभियान सुरु गर्ने भएको छ। सन्धिखर्कमा आयोजित एक अभिमुखीकरण कार्यक्रममार्फत केन्द्रका प्रमुख कमल प्रसाद आचार्यले पहिलो चरणमा सन्धिखर्क नगरपालिका वडा नं. १ र २ का १ देखि ५ वर्ष उमेर समूहका झण्डै एक हजार बालबालिकालाई यो सेवा प्रदान गरिने जानकारी दिनुभयो। बालबालिकाको शारीरिक तथा मानसिक विकास, स्मरण शक्ति वृद्धि र रोग प्रतिरोधात्मक क्षमता बढाउन प्रभावकारी मानिने यो औषधि चैत १४ गते बिहान ६ देखि १० बजेसम्म केन्द्रको प्राङ्गणमा खुवाइनेछ।
अभियान अन्तर्गत १ देखि २ वर्षका बालबालिकालाई २ थोपा र ५ वर्षसम्मकालाई ४ थोपा औषधि खुवाइने भएकाले अभिभावकहरूलाई आफ्ना बालबालिकालाई खाली पेटमा ल्याउन आग्रह गरिएको छ। जिल्ला समन्वय समितिका प्रमुख जीवनारायण कोइरालाको अध्यक्षतामा सम्पन्न उक्त कार्यक्रममा विशेषज्ञहरूले स्वर्ण विन्दु प्राशनको महत्वबारे प्रकाश पार्नुभएको थियो भने विभिन्न सरोकारवाला निकायका प्रतिनिधिहरूले अभियानको सफलताको कामना गरेका थिए। यस कार्यक्रमले आयुर्वेदप्रति जनचेतना जगाउन र परम्परागत उपचार पद्धतिको संरक्षणमा महत्वपूर्ण सहयोग पुग्ने विश्वास लिइएको छ।
