भैरहवा । अख्तियार दुरुपयोग अनुसन्धान आयोगले घुससहित रंगेहात पक्राउ गरेका मालपोत कार्यालय भैरहवाका एक कर्मचारीको साथबाट स्रोत नखुलेको थप रकम बरामद गरेको छ। आयोगको बुटवल कार्यालयबाट खटिएको टोलीले मालपोत कार्यालयका नायब सुब्बा ओमबहादुर खाम्चा मगरलाई सेवाग्राहीबाट लिएको २ लाख रुपैयाँ घुससहित नियन्त्रणमा लिएको थियो।
पक्राउ परेका कर्मचारीको खानतलासी गर्ने क्रममा उनले बोकेको झोलाबाट स्रोत नखुलेको थप ३ लाख ५० हजार रुपैयाँ फेला परेको अख्तियार स्रोतले जनाएको छ। नासु खाम्चाले जग्गाको सर्जमिन मुचुल्का तयार गर्न सहजीकरण गरिदिने भन्दै सेवाग्राहीसँग घुस माग गरेका थिए। विशेष सूचनाका आधारमा खटिएको अख्तियारको टोलीले उनलाई शुक्रबार साँझ सिद्धार्थनगर नगरपालिका-१३ स्थित होटल निर्मलाबाट नियन्त्रणमा लिएको हो।
सुरुमा घुसको २ लाख रुपैयाँसहित पक्राउ गरिए पनि आवश्यक कानुनी प्रक्रिया र चेकजाँच बढाउँदा उनको साथमा साढे ३ लाख रुपैयाँ अतिरिक्त रकम भेटिएपछि घटनाले थप मोड लिएको छ। उक्त रकमको स्रोत नखुलेकाले यस विषयमा पनि थप अनुसन्धान भइरहेको अख्तियारले जनाएको छ। हाल नासु खाम्चालाई नियन्त्रणमा लिएर अख्तियारले विस्तृत अनुसन्धान अगाडि बढाएको छ।
