पाल्पा । जेन-जी आन्दोलनका क्रममा काठमाडौँस्थित जगन्नाथदेवल कारागारबाट भागेका ठगी मुद्दाका एक कैदीलाई जिल्ला प्रहरी कार्यालय पाल्पाले पक्राउ गरेको छ। पाल्पाको रैनादेवी छहरा गाउँपालिका–२ सर्देवा घर भएका ३१ वर्षीय कृष्ण दर्जीलाई प्रहरीले विशेष सूचना र निरन्तरको निगरानीका आधारमा नियन्त्रणमा लिएको हो।
माघ २४ गते साँझ करिब ७ बजेको समयमा तिनाउ गाउँपालिका–३ स्थित सिद्धबाबा मन्दिर नजिकैबाट उनलाई पक्राउ गरिएको जिल्ला प्रहरी कार्यालय पाल्पाका सूचना अधिकारी एवं प्रहरी नायव उपरीक्षक होम प्रकाश चौधरीले जानकारी दिनुभयो। पक्राउ परेका दर्जीलाई आवश्यक प्रक्रिया पूरा गरी कारागार कार्यालय पठाइएको प्रहरीले जनाएको छ।
