राजविराज । अख्तियार दुरुपयोग अनुसन्धान आयोगले भेटेरनरी अस्पताल तथा पशु सेवा विज्ञ केन्द्र, सप्तरीका निमित्त कार्यालय प्रमुखसहित दुई जनालाई घुस रकमसहित नियन्त्रणमा लिएको छ । आयोगको इटहरी कार्यालयबाट खटिएको टोलीले निमित्त कार्यालय प्रमुख डा. राम पवित्र दास र सवारी चालक भोगेन्द्र यादवलाई कार्यालय प्रमुखकै कार्यकक्षबाट नियन्त्रणमा लिएको हो ।
भ्याक्सिनेटरहरूले सेवा उपलब्ध गराए बापत पाउनुपर्ने भुक्तानी रकमको २० प्रतिशत घुस माग गरेको उजुरीका आधारमा उनीहरूलाई समातिएको आयोगले जनाएको छ । टोलीले चालक यादवको साथबाट घुस बापतको रू. ३३ हजार ३५० र स्रोत नखुलेको रू. ४८ हजार ७० गरी जम्मा रू. ८१ हजार ४२० नगद बरामद गरेको छ । यस्तै, यादवको साथबाट रू. १ लाख २९ हजार बराबरको ४ थान चेक र डा. दासको साथबाट रू. १ लाख २५ हजार बराबरको १ थान चेक र मोबाइल बरामद गरिएको छ । नियन्त्रणमा लिइएका दुवै जनामाथि थप अनुसन्धान भइरहेको आयोगका सहायक प्रवक्ता गणेश बहादुर अधिकारीले जानकारी दिनुभयो ।
