वीरगञ्ज । स्रोत नखुलेको १४ लाख १३ हजार ५ सय नेपाली रुपैयाँसहित दुई जनालाई पर्साको वीरगञ्जबाट प्रहरीले पक्राउ गरेको छ । विशेष सूचनाको आधारमा खटिएको प्रहरी टोलीले वीरगञ्ज महानगरपालिका वडा नं. २, घुसुकपुरस्थित इदगाह चोकबाट उनीहरूलाई नियन्त्रणमा लिएको हो ।
पक्राउ पर्नेमा वीरगञ्ज-२ घुसुकपुरका ३९ वर्षीय संजय कुमार साह र बाराको महागढीमाई नगरपालिका-४ बगडमपुरका ४१ वर्षीय शनि कुमार ठाकुर रहेका छन् । प्रहरीले भारतीय र नेपाली नम्बर प्लेटका दुईवटा मोटरसाइकल जाँच गर्ने क्रममा उक्त रकम बरामद गरेको थियो । प्रहरी नायब उपरीक्षक तथा सूचना अधिकारी सुवास भट्टका अनुसार, मोटरसाइकलमा फल्स सिलिङ बनाएर लुकाइएको अवस्थामा रकम फेला परेको हो ।
पक्राउ परेका दुवै जनालाई हुण्डी कारोबार सम्बन्धी कसूरमा अनुसन्धान अगाडि बढाइएको छ । उनीहरू विरुद्ध मुलुकी अपराध संहिता, २०७४ बमोजिम 'हुण्डी सम्बन्धी कारोबार गर्न नहुने' कसूरमा पर्सा जिल्ला अदालतबाट पाँच दिनको म्याद थप गरी अनुसन्धान भइरहेको प्रहरीले जनाएको छ । प्रहरीले वीरगञ्ज क्षेत्रमा हुण्डी कारोबारको सञ्जाल सक्रिय रहेको सूचनाका आधारमा निगरानी बढाएको छ ।
