नौतनवा । भारत-नेपाल सीमा क्षेत्रमा हुने अवैध कारोबार नियन्त्रणका क्रममा भारतीय प्रहरीले नौतनवाबाट करिब रू १३ लाख बराबरको अवैध जुत्ता-चप्पल बरामद गरेको छ। नेपालतर्फ चोरी-पैठारी गर्ने उद्देश्यले भण्डारण गरी राखिएको १७ पोका जुत्ता-चप्पल प्रहरीले नियन्त्रणमा लिएको हो।
भारतका विभिन्न नाका हुँदै नेपाल लैजाने तयारी भइरहेका बेला प्रहरीले ती सामग्री बरामद गरेको हो। सोनौली र नौतनवा नाकालाई माध्यम बनाएर दिल्लीलगायत भारतका विभिन्न सहरबाट नेपालतर्फ अवैध मालसामान ओसारपसार गर्ने गिरोह सक्रिय रहेको पाइएको छ।
विभिन्न यातायातका साधनमार्फत सीमावर्ती बजारसम्म ल्याइएका सामग्री मौका मिलाएर नेपाल पुर्याउने गरिएको सुरक्षा अधिकारीहरूको दाबी छ। भारतीय सुरक्षा निकायले बरामद गरिएका सामग्री नियन्त्रणमा लिई यस तस्करी सञ्जालबारे आवश्यक कानुनी अनुसन्धान तथा थप कारबाही अघि बढाएको जनाएको छ।
